विश्वकप २०१८

मानन्धर संघया बुन्हि थीथी ज्याझ्वः यासें हन

केन्द्रीय मानन्धरया संघया ६५ क्वःगु बुन्हि (स्थापना दिवस) वंगु शुक्रवाः थीथी ज्याझ्वः यासें हन । संघया सभापति गोपालकृष्ण मानन्धरया सभापतित्वय् जूगु उगु ज्याझ्वलय् मूपाहांकथं सछि दँ दुम्ह देय् थकालि ललितमान मानन्धर झायादीगु खः ।
मूपाहापाखें संघया संस्थापक सभापति देवीदास मानन्धरया किपाय् स्वांमाः क्वखायेकाः व त्वाःदेवा च्याकाः उलेज्या यानादीगु ज्याझ्वलय् संघया उपसभापति बद्रीनारायण मानन्धरं लसकुस यानादीगु खः ।
ज्याझ्वलय् मानन्धर समुदायया छम्ह विशिष्ट व्यक्तियात प्रबुद्ध व्यक्तिकथं सम्मान यायेगु झ्वलय् थुगुसी नेपालभाषाया नांजाःम्ह आख्यानकार मथुरा साय्मियात प्रबुद्ध व्यक्तिकथं सम्मान याःगु खः । अथे हे नेपालभाषाया च्वमि राजेन मानन्धरया ‘बुनाः त्याःपिं’ नियात्रा सपूmया निंतिं मथुरा साय्मि सिरपाः लःल्हाःगु खःसा संघया बुन्हिया लसताय् ‘साः व साय्मि’ विषयय् जूगु च्वखँ कासाय् उत्कृष्ट च्वमि कथं कामना मानन्धरयात शेरलक्ष्मी, लक्ष्मीबहादुर, महालक्ष्मी सिरपाः लःल्हाःगु खः ।
उगु हे ज्याझ्वलय् न्यय्द्वः तका दांया मोहनलाल खिं मानन्धर सिरपाः लाय्कूसाः मानन्धर समाजया थकालि तीर्थनारायण मानन्धर व नीन्याद्वः तका दांया उगु हे सिरपाः बनेपा जापाली गुथिया नायः जगतनारायण मानन्धरयात लःल्हाःगु खः ।
अथे हे थगुने फ्रान्सय् जूगु मिस डिफ एसियाय् उपाधि त्याकेत ताःलाःम्ह मय्जु सुरभि मानन्धर व मिस लिटिल नेवाः–११३८ य् उपाधि त्याकेत सफल जुयादीम्ह मय्जु जेनी मानन्धरयात नं ज्याझ्वलय् विशेषकथं हनेज्या याःगु खः ।
नापं वंगु शैक्षिक सत्रय् पीएचडी, एमबीबीएस, प्लस टु विज्ञान व व्यवस्थापन संकाय नापं एसइइ परीक्षाय् सर्वोत्कृष्ट ल्याः हयादीम्ह छात्र छम्ह व छात्रा छम्हेसित संघपाखें म्हतिं निद्वः तका दां नापं दसिपौ, उत्कृष्ट न्याम्ह मिसा व न्याम्ह मिजंयात छसिकथं केदारनारायण–सुदर्शना तःखाछेँ व न्हुछेनारायण रामदेवी तःखाछेँ सिरपाः लःल्हाःगु खः ।
थुकथं हे थुगुसी शम्भूमान (काकाभाई) बसुन्धरा लमुन्ति कोषपाखें जूगु मचा याकः म्येँ धेंधेंबल्लाः कासा, टेबुलटेनिस, चेस व मचा ब्वाज्या कासाय् विजयी जुयादीपिंत नं सिरपाः, दसिपौ व पदक लःल्हाःगु खः ।
झिद्वः तकाया मिसा विकास कोष व छगू लख न्यासः व न्यातका दांया निसन्तान ग्वाहालि कोष नं नीस्वनेगु ज्या जूगु खः ।

सम्बन्धित बुखँ

LEAVE YOUR COMMENTS