सरकारया गलत मनसाय

थ्व सरकार कामचलाउ सरकार जक खः, तर थ्व सरकारया गतिविधिं धाःसा राज्यया सम्पत्ति दोहन यानाः न्हू वइगु सरकारयात मछिंका त्वःता वनेगु नियत ज्वना ज्या यानाच्वंगु क्यनाच्वंगु दु । प्रतिनिधिसभा व प्रदेशसभाया चुनावया न्हि क्वछिइवं हे थ्व सरकार आचारसंहिता दुने चीधुंकूगु खः । चुनाव जुयाः लिच्वः वयेधुंकाः थ्व सरकार ला झन कामचलाउ जक जुल । सरकारय् दुथ्याःगु दलं हे चुनाव त्याकूगु जूसां खः का धाये, तर सरकारय् दुथ्याःगु कांग्रेस व राप्रपा बांमलाक बुइ धुंकाः अन्तिमय् खःगु मखुगु फुक्कं यानाः जक सरकार त्वःता वनेगु मानसिकताय् थ्व सरकार खनेदत ।

दक्व धइथें बूपिं मन्त्रीत दुथ्याःगु थ्व सरकारया छम्ह हे मन्त्रीं चुनावय् बुत धकाः नैतिकताया लिधंसाय् राजीनामा बिल धाःगु मन्यना । अःखःबतं याये फक्व सरकारी सम्पत्ति थः कार्यकर्तायात इनेगु यानाच्वंगु दु । उलि जक लाक्व पाक्व थः कार्यकर्ता सरकारी ज्याकुथिइ नियुक्ति यानाच्वंगु दु । नेपालय् नैतिकताया ‘खडेरी’ जूगु आः मखु, उकिं थ्व सरकारय् च्वंपिसं नं नैतिकता क्यनी धइगु आशा यायेगु बेकार हे खः । चुनावया न्हि क्वछी धुंकाः जक मखुकि चुनावय् बांमलाक बूगु लिच्वः वयेधुंकाः तकं थ्व सरकारया गृह मन्त्रालयं करौडौ ध्यबाः थः कार्यकर्तातय्त इनाजुल ।

वंगु चुनावय् कांग्रेस, राप्रपा बामलाक बूगु कारण थ्व सरकारया प्रधानमन्त्री शेरबहादुर देउवाया ज्या यायेगु ढंग बांमलाःगुलिं खः तर थ्व खँय् पटक्क हे चिउता मदु । थःगु हे तालं याये मजिउगु, अलोकप्रिय ज्या यानाच्वंगु दु । मतिभ्रष्ट जूम्ह नेताया रुपय् शेरबहादुर खनेदत धकाः स्वय्म कांग्रेसीत चिन्तित जुयाच्वंगु दु । तर कांग्रेस दुने शेरबहादुरयात चिइकेगु शक्तिया विकास थत्थें मजूनि । थःगु ज्या यायेगु ढंग मदुगुलिं चुनावय् बुत धकाः वाःचायेका म्वाःल आः सरकार हिले त्ययेकाः अलोकप्रिय जुइगु ज्या यानामवने धइगु ज्ञां तकं थ्व सरकारय् च्वंपिंके खनेमदु । बरु आः हानं शायद हे मन्त्री जुइखनी धकाः थःगु पदया दुरुपयोग यायेगुलिइ फुक्क धइथें मन्त्रीत जानाच्वंगु दु धकाः स्वय्म सरकारय् दुथ्याःम्हु राज्यमन्त्रीं हे खँ पिने हयेधुंकूगु दु ।

न्हय्गू प्रदेशया अस्थायी मुकाम घोषणा यायेगुली नं सरकारं यक्व अलमल यात । अस्थायी मुकामया निंतिं वःगु प्रतिवेदनयात छथाय् वांछ्वया थ्व सरकारं थःगु स्वार्थ स्वयाः अस्थायी मुकाम घोषणा यात । गथे शेरबहादुर देउवां डोटीया पलेसा धनगढी ल्यःगु खनेदत मेखे कमल थापाया स्वार्थ घानाच्वंगु हेटौंडायात अस्थायी मुकाम दयेकल ।

सत्ता हस्तान्तरणय् नं थ्व सरकार न्ह्यमचिउ । गथे यानाः जिल सरकारया आयु छुं भचासां ताःहाकयेकेगु कुबुद्धिं कांग्रेसयात हे बांमलाःगु मचाः । चुनावया लिच्वः सावर्जनिक जुइधुंकाः शेरबहादुर देउवां बरु पुष्पकमल दाहाल हे न्यादँ प्रधानमन्त्री जु, कांग्रेसं समर्थन याये धकाः डर्टी गेम म्हितेत स्वल । एमाले व माओवादीयात फायेगु ज्याय् सफल जुइथें मच्वनेवं राष्ट्रिय सभाया चुनावया त्वःहः तयाः सरकार थाका तयेगु खेल म्हितल । राष्ट्रिय सभाया चुनाव माघ २४ गते जू वनेत्यंगु दु । थ्व चुनावय् नं कांग्रेसं खास हे नतिजा हये फइमखु । अझ राष्ट्रिय सभाया चुनाव बहुमतीय लिधंसाय् जूगु खःसा कांग्रेस राष्ट्रिय सभाय् निल हे जुइगु खः उकिं थःगु स्वार्थयात ध्यान तयाः एकल संक्रमणीय चुनावी प्रणालीइ अडान तयाः अलमल यात ।

राष्ट्रिय सभाया चुनाव धुंकाः सायद शेरबहादुर देउवां सरकारया सिफारिसय् स्वम्ह दुजःत राष्ट्रपतिपाखें मनोनयन यायेगुली नं खिचिखिचि याइतिनि । स्पष्ट रुपं सरकारया सिफारिशय् राष्ट्रपतिं मनोनयन याइगु राष्ट्रिय सभाया दुजः ल्ययेगु ज्या न्हूगु सरकारया खः तर शेरबहादुरया मति मभिन धाःसा थ्व ज्या नं जिं हे याये दयेमाः मखुसा सरकार हे त्वःते मखु धकाः जिद्दी यायेत नं बेर मदु ।

थः बहिर्गमन जुइगु स्थितिइ थीथी सरकारी निकायय् नियुक्ति यायेगु जक मखुकि सशस्त्र व प्रहरी दुने एआइजीया दरबन्दी अप्वयेकेगु, ३० बर्षे कार्यकाल चिइकाः एआईजितसें थःगु कार्यकाल अप्वयेकेगु गलत लँपुइ सरकार दु । स्थायी सरकार दुसा थुज्वःगु म्वाःमदुगु ज्या यायेत थाकुइ तर वनेत्यंगु सरकार धकाः लाक्वपाक्व याये मत्यःगु ज्यात यानाजुल ।

चुनावया लिच्वः वयेधुंकाः सरकारं लाक्व पाक्व निर्णयत यानाच्वंगुलिं उज्वःगु निर्णयय् मुख्य सचिव व सचिवत संलग्न मजुइत एमालें चेतावनी बिइधुंकाः सचिवतसें उज्वःगु प्रस्तावत मन्त्रिपरिषद्या मुँज्याय् यंकेत लिचिलेवं मन्त्रीतसें हे ठाडो प्रस्ताव हयाः थीथी निकायय् नियुक्ति यायेगु, वैदेशिक भ्रमणया योजनात स्वीकृत यायेगु, थः कार्यकर्तातय्त पोसे यायेगु निर्णयत मन्त्रिपरिषदया मुंज्या यानाच्वन धकाः पिने व्यापक आलोचना नं जुल । तर बुद्धि मदुम्ह सरकारया प्रधानमन्त्री व मन्त्रीतसें मेगु न्यादँ तक वाम सरकार पक्का जुल उबले तक थःपिं छु यानाच्वनेगु बरु नैतिकता सैतिकता गोली मारो मौका छु छु याये जिउ लखनउ लुट यानाः वनेमाः धइगु मानसिकता जक क्यंगु खनेदत ।

सरकारया थुज्वःगु गलत गतिविधियात न्हापा निर्वाचन आयोगं मिखा तिसिना बिल, लिपा अदालत नं भौयात दुरु पिवाः तयेथें खनेदत । छक्व मिं पुइवं पशुतसें ला मिइ थिइ मजिउ धकाः चाइ तर कांग्रेसया शेरबहादुर जब जब प्रधानमन्त्री जुल उबलय् उबलय् कांग्रेसयात घाटा जुइगु व्यापार याः जुल । तर नं न शेरबहादुर चेते जुल न कांग्रेस हे । वामतय् सरकार न्यादँ स्थायी रुपं न्ह्यात धाःसा नेपालय् नं भारतय् थें नेपाली कांग्रेसया हालत भारतया कांग्रेस आइ थें जुइत बेर मदु । न्यादँ दुने कांग्रेसं वर्तमान नेतृत्वयात विस्थापित यानाः न्हूगु पुस्ताया नेतृत्वं कांग्रेस न्ह्याकूसा जक कांग्रेसं थःगु अस्तित्व ल्यंका तये फइ ।

सम्बन्धित बुखँ

LEAVE YOUR COMMENTS