ने. सं. ११४४ चौलाथ्व अष्टमी -

बोली व उकिया मू अले सजग जनता

झी छगू धापू दु – काचाक्क नमवाये, थ्याचाक फ्यमतुये । थ्व नितां चिजं अन्ततः भिंकी मखु । थौंकन्हय्या राजनीतिक परिवेशय धाये वा सामाजिक सञ्जालय् मनूतय्सं मत्ति वःवःथे धायेगु यानावयाच्वंगु दु । सुयातं लय्तायेकेत वा तंचायेकत धाइगु खँ लिपा वनाः अतिकं घाटक जूवने फु ।

खँ नकतिनि सत्तारुढ पार्टीया छम्ह नेतां थःगु आनमान जक मखु दयाच्वंगु मन्त्री पदं तकं राजीनामा यायेमाःगु स्थिति ब्वलंका बिउगुया खः । भगवान बुद्धं मनूतय्सं याइगु अकुशल कर्म मध्ये वचनं याइगु कुकर्मयात नं कयातःगु दु । वचनं मनूतय्त तसकं घाः लाकेफु । क्षुद्र वचनया कारणं हे मनूतय् दथुइ वैरभाव ब्वलनीगु व अन्ततः ल्वापुइ क्वचाइगु अनेक दृष्टान्त झीसं खंके फइ ।

बंगलादेशय् चिकित्सा शिक्षा ब्वं वंपिनि व लिहां वःपिं छात्रातय्गु विषयय् म्वाःमदुगु बिचाः पितबिउगु कारणं कानुन, न्याय तथा संसदीय मामिलामन्त्री शेरबहादुर तामाङं राजीनामा बिइमाल । थ्व राजीनामा धुंकाः नं आपालं न्ह्यसः अझं ल्यहेँ ल्यहेँ पुयाः वयाच्वंगु दनि । पद व सत्ताय् थ्यन धकाः धायेवं न्ह्याम्हेस्यां लिफः न्ह्यफः हे मस्वसे न्ववाये जिउ ला ?

थ्व स्वयां न्ह्यः थज्याःगु हे बोली न्ववाःम्ह झापाया बि एन्ड सी मेडिकल कलेजका सञ्चालक दुर्गा प्रसाईया धापूयात समर्थन यायेकथं तामाङं थःगु बिचाः न्ह्यब्वःगु खः । थौंकन्हय् सामाजिक संजालय् न्ह्याम्हेस्यां न्ह्याथें जाःगु अभिब्यक्ति बीगु याना हयाच्वंगु दुसा पदया जिम्मेवार मनूतय्सं तकं मत्ति वःथे वा सुयागुं अभिष्ट पुवंकेगु निंतिं न्ववायेगु धयागु अराजकताया हद खः ।

पूर्व स्वास्थ्य मन्त्री गगन थापाया अभिव्यक्तियात आः तकं सुना नं हाथ्या बीफयाच्वंगु मदुनि, बिउगु मदुनि । स्वयं बंगलादेशय् आखः ब्वनावःपिं विद्यार्थीतय्सं तकं थुकिया विषय प्रतिक्रिया बिउगु मदुनि ।

मन्त्री थेंजाःम्ह मनुखं सुयागुं अभियानया हे ब्वः जुयाः थःत न्ह्यचिइके हयेगु धयागु उज्वःम्ह मनूया चरित्र न्हापा न्ह्याक्वः हे बांलानाच्वंगु खःसां आःया इलय् अनेक लोभ वा अन्य कारणं विचलनय् वंगु मखु धकाः धायेफइ मखु ।

थ्व हे मुद्दा दुने आः न्हापाया स्वास्थ्य मन्त्री जुइधुंकूम्ह नेपाली कांग्रेसया नेता गगन थापां बंगलादेशय् चिकित्सा विषय ब्वनावःपिं मध्ये ९० प्रतिशतं मयाक विद्यार्थीतय्सं प्रमाण पत्र न्यानाहःगु वा अनैतिककथं कयाः हःगु खः धयागु अभिव्यक्ति बियाच्वंगु दु । थ्व खँयात लिसा लिसा कयाः अनेककथं प्रमाणित यायेत स्वयाच्वंगु दु ।

नेपाः सरकारया स्वास्थ्य मन्त्री समेत जुइधुंकूम्ह मनुखं चिकित्सा विद्यार्थीतय्गु विषयय् थुकथं न्ववायेगु कम गम्भीरया खँ मखु । बंगलादेशं चिकित्साशास्त्र ब्वनाः डाक्टर जुयाः अनेक नीजि वा सरकारी अस्पतालय् कार्यरत जुयाच्वंगु सन्र्दभय् न्हापाया स्वास्थ्य मन्त्रीया थज्याःगु आपत्तिजनक अभिब्यक्तियात सामान्यकथं कायेफइगु स्थिति मदु ।

सुं नं विरामी मनू थःगु स्वास्थ्य परिक्षणया झ्वलय् बंगलादेशं आखः ब्वनावःम्ह डाक्टर न्ह्यःने वये मात्रं हे अनेक आशंकाया खँ मनय् वयेधुंकी । ल्वचंकःम्ह मनू वासः याकेगु स्वयां मानसिक तनाव दुने थप पीडित जुइमाःगु स्थिति ब्वलनी ।

सावर्जनिक संजालय् थुकथंया गैर अभिब्यक्ति बीगु, सामान्य मनुखं कल्पना तकं याये मफइगु खँयात थःगु भाषणया विषय दयेकेगु ज्या नेपाःया प्रधानमन्त्री केपी शर्मा ओलीं तकं याना जूगु अनेक प्रसंगत न्ह्यःने खनेदइ । छम्हं मेम्हेसित क्वह्यंकेगु थज्याःगु अभिव्यक्तिं समाजयात हे प्रभावित यानाच्वनी सा अन विश्वासया संकट नं खनेदयाच्वनी ।

पूर्व स्वास्थ्य मन्त्री गगन थापाया अभिव्यक्तियात आः तकं सुना नं हाथ्या बीफयाच्वंगु मदुनि, बिउगु मदुनि । स्वयं बंगलादेशय् आखः ब्वनावःपिं विद्यार्थीतय्सं तकं थुकिया विषय प्रतिक्रिया बिउगु मदुनि ।

यदि थ्व वास्तविकता खःसा नेपालं सयौं मनूत विदेशय् वनाः उच्च शिक्षा कायेत वनाच्वंगु फुक्कं लगानी थुकथं हे व्यर्थया खः कि मात्र म्हुतुया शौकं न्हापा स्वास्थ्य मन्त्री थें जाःगु पदय् कार्यरत जुयागुया अनुभवया लिधंसाय् दुने बंगलादेशं आखः ब्वनाः वःपिं मनूतय्गु विषयया थ्व प्रतिक्रिया खः, छानविनया आवश्यता दु ।

शेर बहादुर तामाङ, दुर्गा सुवेदी, गगन थापा, सुशिला कार्की थेंजाःपिं विशिष्ट मनूतय्गु थुकथंया अन्तहिन प्रतिक्रिया वयाच्वंगुया ल्यूने डा. गोविन्द केसीया आमरण अनशनं भूमिका म्हिताच्वंगु खँय् शंका मदु । संविधान प्रदत्त आम जनताया स्वास्थ्यया अधिकार प्राप्तिया निंतिं जुयाच्वंगु आमरण अनसनया औचित्ययात न्यून यायेगु निंतिं सामाजिक संचार माध्यमया बलय् तथानाम धायेगु ज्या जुयाच्वंगु दु ।

जनता न्हापा स्वयां अतिकं सजग जुइधुंकूगु व थज्याःगु अभिव्यक्तिया लागि सिंगो सामाजिक सञ्जाल, सञ्चारमाध्यम व संगठनं तकं आलोचना याये धुनेवं आः थज्याःगु अभिब्यक्तियात सुना नं सह यायेमफइगु सन्देश जग जाहेर जुइधुंकूगु दु । थुकिया परिणाम नकतिनि हे मन्त्रीथें जाःगु पदं थःत च्यूत यायेमाःगु स्थितिं आः सकलें सजग जुइमाःगु दु ।

थुम्ह मन्त्रीं थःगु अभिब्यक्ति प्रति क्षमा फ्वनाा जक मगात, मन्त्री पदं राजीनामा हे यायेमाःगु अवस्था थ्यन । थुकथं हे मन्त्री तामाङया राजीनामा लिपा वं सुयागु भाषणपाखें प्रभावित जुयाः थःगु अभिव्यक्ति बिउगु खः, उम्ह मनूया प्रति नं कारबाही व छानबिन जुइ आवश्यक दु । थथे जुइफत धाःसा हे थुकथं या अराजकता लिपा लिप नं मजुइगु विश्वास यायेफइ ।

वर्तमान परिस्थितिइ ओली मन्त्रिपरिषद् बने जूगु खुला दइन । थुलि दुने हे छम्ह मन्त्री चिलावनेमाःगु अवस्था वःगु दु सा मेखेर थुगु हे मन्त्रीपरिषदया दुजः मन्त्रीतय्गु गतिविधि नं सन्तुष्ट जुइ फयाच्वंगु मदु । प्रधानमन्त्री ओलीं आःया स्थिर सरकारया नेतृत्व यानाच्वंगु दु । तर स्थिर सरकारया मन्त्रीतय्सं यानावयाच्वंगु गतिबिधिपाखे आम नागरिक सन्तुष्ट जुइफयाच्वंगु मदु ।

छुं ई न्ह्यः संचारमन्त्रीं छगू अन्तरवार्ताय् क्यंगु रवैया, गृहमन्त्रीया सकृयताय् रद्द जूगु यातायात सिन्डिकेट यातायात मन्त्रीया सक्रियताय् हाकनं सलबलय् जुयावःगु, अपायधंगु लुँ काण्डया छानविनयात कयाः अज्ञात थासं छानविन हे गतिहीन यानाबिउगु ज्यां थुगु दुइ तिहाइया सरकारयात सकरात्मक दृष्टिकोणं स्वयेगु वातावरण धमाधम खिउँया वनाच्वंगु दु । सकलें सचेत व सजग जुइमाःगु आवश्यकता दु ।