सरकार व डा. केसी दथुइ सहमति, मनमोहन कलेज छु जुइ ?

येँ – चिकित्सा शिक्षा विधेयकयात कयाः अनसन च्वनादीम्ह डा. गोविन्द केसी व सरकार दथुइ बिहिवाः जूगु सहमति लिपा आः स्वनिगलय् झिदँ तक मेडिकल अस्पताल चायेके मदइगु जूगु दु । सरकारया प्रतिनिधि व गोविन्द केसीया प्रतिनिधि दथुइ स्वनिगलय् झिदँ तक मेडिकल कलेज चायेके मदइगु, स्वनिगलय् कलेज चायेकेगु निंतिं आशयपत्र कयाः पूर्वाधार दयेकेधुंकूगु कलेज सरकारं न्यायेगु वा स्वनिगलं पिने वने चाहे जूसा प्रोत्साहन सुविधा बीगु, छगू विश्वविद्यालयं न्यागुलिं अप्वः मेडिकल कलेजयात सम्बन्धन मबीगु, मेडिकल कलेजतय्सं ७५ प्रतिशत छात्रवृत्ति बीमाःगु, मेडिकल कलेज चले यायेत स्वदँ तक थःगु हे अस्पताल चले यानातःगु जुइमाःगु, कर्णाली स्वास्थ्य विज्ञान प्रतिष्ठानय् विद्यार्थी भर्ना यायेत कार्यदल दयेकेगु, विश्वविद्यालय व प्रतिष्ठान पदाधिकारी नियुक्त यायेगु मापदण्ड दयेकेत झिंन्यान्हु दुने कार्यदल दयेकेगु सहमति जूगु खः ।

थ्व सहमति लिपा म्हिगः डा. केसीं अनसन त्वाःथलादीगु खः । वय्कःयात म्हिगः हे चिकित्सा शिक्षा सम्बन्धी उच्चस्तरीय कार्यदलया संयोजक केदारभक्त माथेमा व नेकपा संसदीय दलया उपनेता सुवास नेम्वाङं जुस त्वंकाः अनसन क्वचायेकादीगु खः ।

मनमोहन कलेज छु जुइ ?

सरकारलिसे जूगु सहमतिं आः नेकपाया नेतातय् लगानी दुगु धयातःगु मनमोहन मेमोरियल कलेजं नं झिदँ तक स्वनिगलय् कलेज चायेके दइमखु । थ्व कलेजं कलेज चायेकेगु निंतिं आयशपत्र कयातयेधुंकूगु खः ।

नेकपाया नेतातय् लगानी दुगु धयातःगु थ्व कलेज व बी एण्ड सी कलेज चायेके बीगु निंतिं हे थीथी सरकारं तःक्वः हे माथेमा आयोगं बिउगु सुझावयात बेवास्ता यानाः चिकित्सा शिक्षा विधेयक हयेगु कुतः यानाच्वंगु खः । सरकारया थज्याःगु कुतः विरुद्ध हे डा. केसीं तःक्वः अनसन च्वनेमालाच्वंगु खः ।

आःया सहमति सरकारं इमान्दार जुयाः लागु यात धाःसा मनमोहनं कलेज संचालनया निंतिं झिदँ पिइमाली । यदि मपिइगु खःसा कलेज संचालनया निंतिं दयेकातःगु पूर्वाधार सरकारयात हे मियाथकीगु विकल्प नं दु । यदि मी चाहे मजुल धाःसा स्वनिगलं पिने वनाः धाःसा कलेज संचालन यायेफइ । कलेजयात स्थान्तरण यायेगु निंतिं सरकारं अनुदान नं बीफइ ।

थ्व कलेज संचालन यानाच्वंगु नेपाल स्वास्थ्य सेवा सहकारी संस्था (नेको)या उपाध्यक्ष डा. वंशीधर मिश्रं आः जूगु सहमति सकारात्मक जूगु खँ धयादीगु दु । वय्कलं आः थःपिनि आन्तरिक सहलह यानाः सरकारयात मीगु वा स्थान्तरण यायेगु धयागु बारे निर्णय यायेगु जुइ धयादीगु दु । वय्कलं थःपिनिगु इच्छा नेता मनमोहनया नामं कलेज चालेमा धयागु खः, यदि थ्व हे नामं चले जुइगु खःसा सरकारयात मी नं फु धयादीगु दु । लिसें वय्कलं स्थान्तरण यायेमाःसां थःपिंसं धादिङय् जग्गा कयातये धुनागु खँ नं न्ह्यथनादीगु दु ।

सम्बन्धित बुखँ

LEAVE YOUR COMMENTS