वरिष्ठ संस्कृतिविद् बलदेव जुजु मंत

येँ – वरिष्ठ संस्कृतिविद् बलदेव जुजु (राजोपाध्याय) बुधवाः चान्हय् मंत । बुधवाः बहनी आकाझाकां तसकं मुसु वयाः म्हुतुं हि वयेवं वय्कःयात वीर अस्पताल यंकूगु खः । उपचारया झ्वलय् बुधवाः चान्हय् साढे १२ बजे पाखे वय्कः मदुगु खँ धाःगु दु । वय्कःया अन्त्येष्टि बिहिवाः सुथय् हे पशुपतिइ याःगु खः । ताःई न्ह्यवंनिसें अल्जाइमर ल्वय्पाखें पीडित वय्कः ८४ दँ दुम्ह खः । वि.सं. १९९२ या जेठय् येँया मखंत्वालय् बूम्ह वय्कः नेवाः संस्कृतिया विज्ञ खः । नेवाः संस्कृति बारे वय्कःया तःगू हे सफू पिदनेधुंकूगु दु ।

नेपाःया तान्त्रिक द्यःपिनि बारे वय्कःया न्हापांगु सफू पिहां वःगु खः । ने.सं. ११०५ य् पिदंगु ‘नेपाःया तान्त्रिक द्यः व तान्त्रिक पुजा’ नांया थ्व सफू वय्कलं मेम्ह संंस्कृतिविद सुरेन्द्रमान श्रेष्ठ लिसे जानाः च्वयादीगु खः । अथेहे वय्कलं श्रेष्ठलिसे हे जानाः च्वयादीगु सफू ‘कान्तिपुर’ ने.सं. ११०८ य् पिथनादीगु खः ।

अथेहे वय्कः याकःचां हे च्वयादीगु ‘नेवाः संस्कृति व नेवाः दर्शन’ (ने.सं. १११६), ‘नेवाः संस्कार व उकिया विधि’ (ने.सं. १११९) सफू नं पिदनेधुंकूगु दुसा ‘तलेजु’ किपा हना बाखं सफूया बाखं नं वय्कलं हे च्वयादीगु खः ।

नेपालभाषा ख्यलय् निबन्ध विधाय् बीगु महत्वपूर्ण सिरपाः ‘ठाकुरलाल सिरपाः’या लिसें ‘गौरी अनन्त सिरपाः’ पाखें छायेपीधुंकूम्ह वय्कः वैदिक प्रतिष्ठानया संस्थापक अध्यक्ष नं खः । दर्शनशास्त्र व संस्कृतय् आचार्य याना तयादीम्ह वय्कलं सरस्वति क्याम्पस व काठमाडौं क्याम्पसय् नेपाली विषयया अध्यापन नं यानादीगु खः ।

मदुम्ह बलदेव जुजुया जहान लिसें स्वम्ह काय व स्वम्ह म्ह्याय् दी ।

सम्बन्धित बुखँ

LEAVE YOUR COMMENTS