स्काउटया पुलांम्ह राष्ट्रिय सचिवयात हन

थिमि – नेपाल स्काउट, मध्यपुर थिमि स्थानीय परिषदं जिल्ला स्काउट ख्वपया जिल्ला आयुक्त, पुलांम्ह राष्ट्रिय सचिवनापं वित्त आयुक्त रामगोपाल कर्माचार्ययात छगू ज्याझ्वःया दथुइ हंगु दु । नेपाल स्काउट, राष्ट्रिय प्रधान ज्याकुथिं हालय् जक वय्कःयात नेपाल स्काउटया हे दकलय् सर्वोच्च पदक ‘सुनौलो गैंडा’ पदकपाखें विभूषित याःगु लसताय् मध्यपुर थिमिया जन आदर्श क्याम्पसय् जूगु ज्याझ्वलय् वय्कःयात उकथं हनेज्यालिसें भिंतुना देछाःगु खः ।

मध्यपुरथिमि नगरपालिकाया उपप्रमुख अञ्जनादेवी मधिकःमिया प्रमुख आतिथ्यताय् उगु ज्याझ्वः जूगु खः । ज्याझ्वलय् नवासें उपप्रमुख मधिकःमिं स्काउटरतय्सं मन, वचन व कर्मय् पवित्र जुयाः समाजसेवाय् लगे जुइगुलिं इमिसं सामाजिक परिवर्तनय् महत्वपूर्ण भूमिका म्हिते फइ धयादिल ।

लिसें वय्कलं स्काठट स्थानीय परिषद्या भवन निर्माणप्रति लसता प्वंकादिसें नगरपालिकापाखें फक्व ग्वाहालि यायेगु प्रतिवद्धता नं प्वंकादिल । ज्याझ्वलय् नेपाल स्काउट केन्द्रीय तदर्थ समितिया दुजः पुण्यराम गोठें थुगु दँय् रोभर स्काउट स्थापनाया शतवार्षिक जूगुलिं रोभर स्काटरतय् निंतिं नं उत्साहजनक दँ खः धयादिल ।

सम्मानित व्यक्तित्व कर्माचार्यं नेपाल स्काउटयात न्हापा जुजुवादी धकाः द्वपं बीगु याना वयाच्वंगु खःसा आतक नं अज्याःगु द्वपनं स्काउट पूर्णरुपं मुक्त जुइ मफयाच्वंगु खँय् असन्तुष्टि प्वंकादिल ।

जनआदर्श क्याम्पसया प्रमुखलिसें वरिष्ठ अधिवक्ता दुर्गामोहन श्रेष्ठं विश्वकप फुटबलय् सर्वोत्कृष्ट कासामियात लुँयागु बल, लाकां व पन्जा बीथें नेपाल स्काउटय् नं उत्कृष्ट ज्या यानादीम्ह कर्माचार्यं सुनौलो गैंडा प्राप्त याःगु खँय् लसता प्वंकादिसें कर्माचार्यं शिक्षा व स्काउटया क्षेत्रय् ज्वःमदुगु योगदान बियादीगुलिं हे अज्याःगु सम्मान प्राप्त यायेत सफल जूगु खः धयादिल ।

ज्याझ्वलय् आदर्श माध्यमिक विद्यालयया प्रधानाध्यापक नापं इकाईया अध्यक्ष बुद्धिकुमार घो, ग्लाडस्टोन एकेदमिया प्रिन्सिपल नापं इकाइ अध्यक्ष विनोद कोइराला, सहायक राष्ट्रिय प्रशिक्षकलिसें स्थानीय परिषद् भवन निर्माण समितिया दुजः दिलकृष्ण प्रजापति, भवन निर्माण समितिया संयोजक भुवनचरण श्रेष्ठ, स्थानीय परिषद् मध्यपुरथिमिया स्थानीय आयुक्त हरिबहादुर श्रेष्ठ लगायतया वक्तातय्सं स्काउटया थीथी पक्ष नापं सम्मानित व्यक्तित्वया कयाः चर्चा यानादीगु खः ।

सम्बन्धित बुखँ

LEAVE YOUR COMMENTS