सवारी दुर्घटनाया कारण तीव्र गति

वंगु आर्थिक दँ २०७४÷७५ य् देय्न्यंकं जूगु सतक सवारी दुर्घटनाय् २,३१८ म्ह सीगु दु । आर्थिक दँ २०७४÷७५ य् जूगु ९,९८९ सवारी दुर्घटनाय् लानाः सीपिं मध्ये मिजं १,७१३ म्ह, मिसा ३६१ म्ह, मिजंमचा १६० व मिसामचा ८४ खः । अथे हे दुर्घटनाय् लानाः ३,८०० म्हं मल्याक गम्भिर रुपं घाःपाः जूगु दुसा ७,५१० सामान्य घाःपाः जूगु तथ्यांक दु ।

ट्राफिक प्रहरी महानिर्देशनालायया प्रहरी उपरीक्षक मुकुन्द मरासिनीं आर्थिक दँ ०७३÷७४ या तुलनाय् आर्थिक दँ २०७४÷७५ य् सवारी दुर्घटनाय् म्हो वःगु धयादी । वय्कःकथं आर्थिक दँ ०७३÷७४ य् सवारी दुर्घटनाय् लानाः २,३८४म्ह सीगु खःसा वयां न्ह्यः आर्थिक दँ ०७३÷७४ य् १०,१७८ सतक दुर्घटना जूगु खः ।

सवारी चालकया लापरवाही, यात्रुतय् गल्ती, लिफ्यानाः न्ह्यःनेगु (ओभरटेक यायेगु), तीव्र गति सवारी चले यायेगु, मादक पदार्थ सेवन, यान्त्रिक गडबडी, अप्वः झ्यातुगु सामान तयेगु आदि ज्याया कारणं सतक दुर्घटना अप्वःगु मरासिनीया धापू दु । स्वनिगलय् १९४, पूर्वी क्षेत्रय् ५१०, मध्य क्षेत्रय् ६६६, पश्चिम क्षेत्रय् ५६७, मध्यपश्चिम क्षेत्रय् २५१, सुदूरपश्चिम क्षेत्रय् १५६ म्ह सीगु दु ।

आर्थिक दँ २०७२÷०७३ य् जूगु १०,०१३ सवारी दुर्घटनाय् २,००६, आर्थिक दँ २०७१÷०७२य् ९,१४५ सतक दुर्घटनाय् २,००४ म्ह सीगु खः । निर्देशनालयया कथं मोटरसाइकल, ट्रक, ट्रिपर, जीप, कार, ट्र्याक्टर, टेम्पु अप्वः दुर्घटनाय् लाःगु दु ।

# स्वनिलय् दुर्घटना अप्वः
ट्राफिक प्रहरी महानिर्देशनालयया कथं स्वनिगःया स्वंगुलिं जिल्ला येँ, यल व ख्वपय् आर्थिक दँ २०७३÷०७४या तुलनाय् आर्थिक दँ ०७४÷७५य् सवारी दुर्घटना अप्वःगु दु । आर्थिक दँ २०७३÷०७४ य् जूगु सवारी दुर्घटनाय् १८२ म्ह सीगुलिइ आर्थिक दँ २०७४÷७५ य् १९५ म्ह सीगु दु । अथे हे आर्थिक दँ २०७२÷०७३ य् १६६, आर्थिक दँ २०७१÷७२ य् १३३ व आर्थिक दँ २०७०÷०७१ य् १४३ म्ह सीगु खः ।

महानगरीय ट्राफिक प्रहरी महाशाखाया प्रमुख नापं वरिष्ठ प्रहरी उपरीक्षक बसन्तकुमार पन्तं चिब्यागु लँ उकिसनं तसकं तीव्र गतिं सवारी साधन ब्वाका हइगुलिं यानाः स्वनिगलय् सतक दुर्घटना अप्वःगु खँ धयादी । ‘चालकयात ट्राफिक ज्ञान मदुगुलिं नं स्वनिगलय् जुइगु सतक दुर्घटना अप्वःगु खः’ वय्कलं धयादी ।

#दुर्घटनाया कारण
ताःई न्ह्यःनिसें महानगरीय ट्राफिक प्रहरी महाशाखाय् च्वनाः ज्या यानादीम्ह पूर्व प्रहरी उपरीक्षक जगतमान श्रेष्ठ मानवीय कारण मध्ये छगू तीव्र गतिं सवारी चले यायेगु व चालकया लापरवाहीया कारणं नं सतक दुर्घटना अप्वयाच्वंगु खः धयादी । २५ प्रतिशत स्वयां अप्वः सवारी दुर्घटना चालकया लापरवाहीया कारणं जुइगु वय्कःया धापू दु ।

अथे हे ७० प्रतिशत छेँया जःखः अथे धइगु ४० किलोमिटर जःखः जुइगु यानाच्वंगु दु ।श्रेष्ठया कथं तीव्र गतिं सवारी चले यायेगु क्रमयात जक म्हो याये फत धाःसां नं म्होतिं नं ३० निसें ४० प्रतिशत सतक दुर्घटनाय् म्होति वइ । ‘मादक पदार्थ सेवन याइपिंत नं मापसे यायेगुपाखें पने फत धाःसा ४ निसें २४ प्रतिशत दुर्घटनाय् म्होति वइ’ वय्कलं धयादी ।

स्वनिगलय् थौंकन्हय् दक्वंकथंया सवारी साधन यानाः ११ लाख व देय्न्यंकं ३१ लाख स्वयां अप्वः सवारी साधन संचालन जुयाच्वंगु दु ।

सम्बन्धित बुखँ

LEAVE YOUR COMMENTS