प्रदेशं हे कर्मचारी नियुक्त यायेगु तयारी

येँ – लांलां बी धुंकाः नं स्थानीय तह व प्रदेशय् केन्द्रीय सरकारं कर्मचारी खटे याये मफयेवं आः प्रदेश सरकारपाखें हे कर्मचारी नियुक्त यायेगु तयारी सुरु जूगु दु । प्रदेशया मन्त्रिपरिषदं हे निर्णय यानाः कर्मचारी पदपूर्ति यायेगु बारे सहलह जुयाच्वंगु खँ सीदुगु दु । स्थानीय तहया निर्वाचन क्वचाःगु दछि दयेधुंकूगु व प्रदेशया निर्वाचन क्वचाःगु च्याला पुलेधुंकाः नं सरकारं माक्व कर्मचारी खटे यायेमफयेवं स्थानीय तह व प्रदेशय् ज्या यायेत हे समस्या जुयाच्वंगु दु ।

केन्द्रं आःतक नं कर्मचारी खटे मयाःगुलिं प्रदेश सरकार धाःसा तम्वयेगु सुरु जूगु दु । प्रदेश नं. ७ या आर्थिक मामिला तथा योजना मन्त्री झपट बाहेरां आः थःथाय् प्रदेश मन्त्रिपरिषदं निर्णय यानाःसां कर्मचारी नियुक्त यायेगु खँ धयादीगु दु । वय्कलं धयादिल, ‘केन्द्र कर्मचारी छ्वया महः धकाः ज्या मयासे टुलुटुलु जक स्वयाच्वने ला फइमखु नि ।

प्रदेश सरकार थः हे स्वायत्त खः, उकिं यक्व लिबात धाःसा प्रदेश मन्त्रिपरिषदं हे निर्णय यानाः कर्मचारी तयेगु जुइ ।’प्रदेश नं. २ या आर्थिक मामिला तथा योजना मन्त्री विजय यादवं धाःसा प्रदेश थःम्हं हे कर्मचारीत पूर्ति याये फइगु व्यवस्था मदुगु खँ धासें केन्द्रं कर्मचारी छ्वया महःगुलिं ज्या यायेत समस्या जुयाच्वंगु खँ कनादिल ।

‘केन्द्र कर्मचारी छ्वया महः धकाः ज्या मयासे टुलुटुलु जक स्वयाच्वने ला फइमखु नि । प्रदेश सरकार थः हे स्वायत्त खः, उकिं यक्व लिबात धाःसा प्रदेश मन्त्रिपरिषदं हे निर्णय यानाः कर्मचारी तयेगु जुइ ।’

वय्कलं धयादिल, ‘जिमिसं योजना ला दयेका, तर कार्यान्वयन यायपिं हे मदु । कर्मचारी समायोजन मजूगुलिं प्रदेशं ज्या तकं न्ह्याकेफुगु अवस्था मदु ।’सरकारं स्वेच्छिक अवकास काये चाहे जूपिं कर्मचारीतय् समस्या मज्यंकूगु, दल निकट कर्मचारीतय्त अप्वः प्राथमिकता बियाच्वंगु व कर्मचारीतय् तह थमकाःगुलिं यानाः समायोजन यायेत समस्या जुयाच्वंगु खँ कर्मचारीतय्सं धायेगु यानाच्वंगु दु ।

नेपाली कांग्रेस लिसे सतिगु नेपाल निजामति कर्मचारी युनियन संघया महासचिव सुभाष कोइरालां बिबिसीलिसे खँ ल्हासें धयादिल, ‘सरकारं स्वच्छिक अवकाश लागू याःगु खःसा ७ हजार कनिष्ठ कर्मचारी बढुवा जुइगु खः, अले उपिं तुरुन्त स्थानीय तह नं थ्यनीगु खः । अथेहे समायोजन ऐन कथं कर्मचारीतय्त छगू तह बढुवा याःगु जूसा नं सकलें लय्लय् तायाः प्रदेश व स्थानीय तहय् वनीगु खः ।

तर थ्व खँ सरकारं थुइके हे चाहे मजू ।’ थौंकन्हय् केन्द्रीय सरकारया मातहतय् ८६ हजार स्वयां अप्वः कर्मचारी दुसा स्थानीय तहय् १७ हजार कर्मचारी थ्यनाच्वंगु दु । थ्व ल्याखं छगू ल्याखं मल्याक निजामति कर्मचारी दु । थुकी २१ हजार न्हूगु दरबन्दी थप यायेमाःगु सरकारी अध्ययनं क्यनाच्वंगु दु ।

 

सम्बन्धित बुखँ

LEAVE YOUR COMMENTS