स्वास्थ्य बीमा कार्यक्रम असफल जुइगु लँपुइ
येँ – सरकारं लागू याःसा स्वास्थ्य बीमा कार्यक्रम बांलाक न्ह्याः वने फयाच्वंगु मदु । बीमा कार्यक्रम न्ह्याकेगु निंतिं माःगु जनशक्ति तकं मदुबलय् थ्व ज्याझ्वः ताः मलाइगु छाँटकाँट खनेदयावःगु खः ।
स्वास्थ्य बीमा यानातःपिं उपचारय् वनीबलय् तकं थःपिनिगु नां दुथ्यानाच्वंगु दु कि मदु धयागु रेकर्ड जक स्वयेत घन्टौं लाइन च्वनेमाःगु बाध्यता जुयाच्वंगु दु । थज्याःगु लगत स्वयेत इन्टरनेट माःसां अस्पतालय् इन्टरनेट तकं मदयाः घन्टौं लाइन च्वनाः थःपिनि नां रुजु याकेमालाच्वंगु दु ।
स्वास्थ्य बीमा कार्यक्रमं ल्वगितय्त बांलाक सेवा बीमफयाच्वंगु खँ स्वास्थ्य मन्त्रालयं तकं स्वीकार यायेधुंकूगु दु । स्वास्थ्य मन्त्रालयया प्रवक्ता महेन्द्र श्रेष्ठं विरामीतय्त विश्वसनीय सेवा बीमफयाच्वंगु धासें थुकियात चुस्त रुपं न्ह्याकेत मन्त्रालयं ज्या यानाच्वंगु खँ धयादीगु दु ।
स्वास्थ्य बीमापाखें उपचार सेवा बिया वयाच्वंगु मेची अञ्चल अस्पतालया मेडिकल सुपरिडिटेन्डेन्ट डा. पिताम्बर ठाकुरं बिबिसीलिसे खँ ल्हासें थीथी समस्या बारे जानकारी बियादिल । वय्कलं धयादिल, ‘बहिरंग विभागय् नं ५० प्रतिशत स्वयां च्वय् बीमा याकातःपिं ल्वगित वइ । उमिगु लगत स्वयेमाः । तर थज्याःगु लगत रुजु याइपिं कर्मचारी हे मदु, इन्टरनेट सेवां बांलाक ज्या मबिउ ।’
बीमा यानातलकि गुणस्तरीय उपचार कायेदइगु विश्वास बियाः न्ह्याकूगु बीमा कार्यक्रम अस्पतालया भौतिक संरचना व जनशक्ति अभावया कारणं हे असफल जुइगु खनेदया वःगु खँ सम्बन्धित मनूतय्सं धाःगु दु ।
थांैकन्हय् देय्या ४२ गू जिल्लाय् स्वास्थ्य बीमा कार्यक्रम लागू यानातःगु दुसा ३६ गू जिल्ला सेवा बिया वयाच्वंगु खँ स्वास्थ्य बीमा बोर्डं धाःगु दु ।
बोर्डया कार्यकारी निर्देशक मदन उपाध्यायं सेवा चुस्त यायेगु जिम्मा स्वास्थ्य मन्त्रालयया जूगुखँ धयादी । तर स्वास्थ्य मन्त्रालययाके धाःसा गुबलय् तकया दुने बीमा सेवा बांलाकेगु धयागु तकं धायेफुगु अवस्था मदु ।
स्वास्थ्य बीमा कयातःपिंसं छुं नं सरकारी अस्पतालपाखें ओपीडी सेवा, इमर्जेन्सी, ल्याब, सामान्य शल्यक्रिया लगायतया सेवा कायेफइ ।
LEAVE YOUR COMMENTS