जान्भी छाय् दिक्क ?

भारतीय फिल्म उद्योग बलिउडय् थुगु दँय् ‘डेब्यू’ याःपिं कलाकारतय् ल्याः आपालं दु । छगू इलय् बलिउडया चर्चित अभिनेता–अभिनेत्रीया कायम्ह्याय्पिं नापं मेपिं आपालं कलाकार ‘न्यूकमर’या रुपय् दुहां वयाच्वंगु दु । उकी मध्ये दकलय् अप्वः खास रुपं चर्चा धाःसा मदुम्ह अभिनेत्री श्रीदेवी कपुरया म्ह्याय् जान्भी कपुर व नायिक सैफ अली खान व वया न्हापांम्ह कलाः अमृता सिंहपाखें दुम्ह म्ह्याय् सारा अली खानया जुयाच्वंगु दु ।

जान्भी व सारा ‘स्टार किड्स’ जूगुलिं हे अत्याधिक रुपं चर्चा जुयाच्वंगु खँय् छुं शंका यायेम्वाः । थुपिं निम्हेसिया तुलना नं उत्तिकं जुयाच्वंगु दुसा निम्हेसित भविष्यया स्टार जक मखसे प्रतिस्पर्धीया रुपय् कनं कायेगु याना हःगु दु । वंगु शुक्रवाः जक जान्भीया फिल्म ‘धडक’ प्रर्दशनय् वःगु खः । साराया डेब्यू फिल्म ‘केदारनाथ’ थुगु दँया अन्त्य तकया दुने प्रर्दशनय् वइगु जुयाच्वंगु दु ।

तर धडकयात कयाः खास हे चर्चा धाःसा जुयाच्वंगु मदुसां उकिया अभिनेत्री जान्भीया धाःसा बांलाक हे चर्चा जुयाच्वंगु दु । धडकया खास हे चर्चा जुयामच्वंगु अवस्थाय् थ्व इलय् यक्वसिनं जान्भीयात ‘साराया फिल्मं गज्याःगु लिच्वः लाकी’, ‘सारालिसें गुलितक ग्याःचिकु दु’ धइथेंज्याःगु न्ह्यसः न्यनेगु यानाच्वंगु दु ।

गुलिसिनं ला जान्भी व सारायात तुलना यानाः नं स्वयेगु याना हयाच्वंगु दु । थःत सारालिसें तुलना याःगु खँय् जान्भी धाःसा दिक्क चायाच्वंगु दु । थुकियात कयाः जान्भीया लिसः दु, ‘साराया न्हापां फिल्मं हे बलिउडतय् तहल्का न्यंकी । व छम्ह प्रतिभाशाली व उर्जावान क्षमताया मिसा खः ।’ नापं जान्भीं थ्व नं इनाप याःगु दु कि थः व साराया दथुइ तुलना मयाये ।

सम्बन्धित बुखँ

LEAVE YOUR COMMENTS