सपिङ मलय् मि च्यानाः रुसय् ६४ म्ह सित

एजेन्सी- रुसय् छगू सपिङ मलय् मि च्यानाः ६४ म्ह मनूत सीगु दु । साइबेरियाय् लाःगु केमेराभा शहरय् च्वंगु विन्टर चेरी कम्प्लेक्सय् मि च्याःगु खः । मिइ लानाः सीपिं अप्वः धयाथें मस्त जूगु खँ धाःगु दु ।

कम्प्लेक्सया दकलय् च्वय्या तल्लां मि च्यानावःगु खँ धाःगु दु । थ्व मलय् थीथी पसःया लिसें सिनेमा हल, बलिङ यायेथाय् नं दु । बांमलाक मि च्यायेवं थ्व कम्प्लेक्सय् च्वनाच्वंपिं मनूत झ्यालं झ्यालं तिंन्हुया वःगु भिडियो सोसल मिडियाय् पोस्ट जुयाच्वंगु दु ।
मि च्याःगु कारण सीमदुनि धाःगु दु । तर मी नयाः पौ कुतुं वयाः निगू सिनेमा हलय् लाःगु खँ स्थानीय अधिकारीतय्सं धाःगु दु ।

रुसी अधिकारीतय्सं कम्प्लेक्सय् मि नःगुयात आपराधिक घटना कथं कयाः छानविन सुरु याःगु दु । छानविन अधिकारीतय्सं प्यम्हेसित ज्वनाः बयान कयाच्वंगु दु । कम्प्लेक्सया थुवाः लिसें कम्प्लेस संचालन यानाच्वगु कम्पनीया प्रमुुखयात ज्वनाः न्यनेकने सुरु याःगु खः ।

स्थानीय ई कथं सनिलय् ५ बजे मि च्यायेगु सुरु जूगु खः । थ्व मि स्यायेत जक ६६० म्ह उद्धारकर्मीतय्त परिचालन याःगु खः । दमकल कर्मचारीपिंसं थुगु कम्प्लेक्सं अझं कुँ पिहां वयाच्वंगु व भवनया नं दुनावनीगु खतरा दुगु खँ धाःगु दु ।